ДАЛАЙН ЗАХИРГАА ХӨЛӨГ ОНГОЦНЫ БҮРТГЭЛ, ХЯНАЛТЫГ ЭРЧИМЖҮҮЛЛЭЭ
Монгол Улсын Далайн захиргаа нь хөлөг онгоцны бүртгэлийн үйл ажиллагааг өргөжүүлж, бүртгэлтэй хөлөг онгоцнуудад тавих техникийн хяналтыг сайжруулах зорилгоор гадаадын хоёр компанитай хамтран ажиллах гэрээ байгуулав.
Энэ хүрээнд БНХАУ-д үйл ажиллагаа явуулдаг БНСУ-ын “Union Bureau of Shipping” (UBS) компанийн төлөөлөлтэй Хөлөг онгоцны бүртгэлийн зуучлалын гэрээ байгууллаа. Энэ гэрээ нь Монгол Улсын далбаан дор бүртгэлтэй хөлөг онгоцны тоог нэмэгдүүлэхэд чухал үүрэг гүйцэтгэх аж.
Мөн “Сapital register of shipping” компанитай “Монгол Улсын нэрийн өмнөөс хөлөг онгоцтой холбоотой хууль ёсны гэрчилгээжүүлэлт болон бүртгэл хийх үйлчилгээг үзүүлэх тухай” гэрээ болон “Хүлээн зөвшөөрөгдсөн байгууллага”-ын үйл ажиллагаа явуулах эрх бүхий хөлөг онгоцны бүртгэлд бүртгэгдсэн хөлөг онгоцнуудад техникийн хяналт хэрэгжүүлэх, гэрчилгээжүүлэх эрх олгох гэрээ байгууллаа.
Эдгээр гэрээ нь зөвхөн бүртгэлийг нэмэгдүүлэхээс гадна хөлөг онгоцны аюулгүй ажиллагаа, техникийн хяналтад мэргэжлийн үнэлгээ хийж, олон улсын дүрэм журамд нийцсэн эсэхийг хянаж, холбогдох гэрчилгээг олгох боломжийг бүрдүүлж, үйл ажиллагааны хяналтын механизмыг сайжруулж буй юм.
