БАЯР НААДМЫН ӨДРҮҮДЭД УСАН ЗАМЫН ЭРГҮҮЛ, ХЯНАЛТ ТАВЬЖ АЖИЛЛАЛАА
УЛААНБААТАР. /2025.07.23/ — Үндэсний их баяр наадмын амралтын өдрүүдэд буюу 7 дугаар сарын 10-20-ны хооронд Монгол Улсын Далайн захиргаа Архангай, Хөвсгөл, Увс болон Говьсүмбэр аймгийн томоохон нууруудад усан замын тээврийн хяналт, шалгалтыг эрчимжүүлэн зохион байгууллаа.
Хяналт шалгалтыг Өгий, Тэрхийн цагаан, Хөвсгөл, Хяргас, Хаялага нууруудад нийт 16 албан хаагч, үүнээс 4 улсын байцаагч үүрэг гүйцэтгэсэн бөгөөд зарим нуурт завьт эргүүлийг байнгын ажиллагаатайгаар явууллаа.
Эргүүлийн явцад бичиг баримтын зөрчилтэй тээврийн хэрэгсэл, хүүхдийг хараа хяналтгүй орхих, зориулалтын бус хийлдэг хэрэгсэл ашигласан зэрэг зөрчил илэрсэн бөгөөд холбогдох арга хэмжээг газар дээр нь авч, нуурын эргээс гаргах шаардлага тавьж ажиллалаа.
Далайн захиргаа баяр наадмын үеэр иргэд, аялагчдад аюулгүй байдлын заавар, зөвлөмж өгч, усан замын осол, эрсдэлээс урьдчилан сэргийлэх чиглэлээр идэвхтэй ажиллав.
